係得妳無變到咋

風月堂 (奧海城)

扮野裝修 夾餅縮水
大頭慨嘆：風月堂變左

白色梳化 白色卡位 白色餐枱 白色牆
哎呀 乜搞到成間IFC Palace Cafe 咁？
唔好扮型啦 以前個含蓄look(!)咪幾舒服

夾餅縮水縮到慘不忍睹
但雪糕就多到離晒譜
仲要蠢到同一時間上晒兩款配雪糕但又要趁熱食o既甜品
(夾餅 & 芒果紅豆酥豆)
唔係連食野都要multi-tasking 呱?

係得妳無變到咋
阿經理
(!食到經理個樣都記得 我地以前真係有夠痴線!)

人多好辦事

妹記 / TST

以為7點可以去到唔駛訂枱都得
但最終被放遂去左廚房附近
一坐低就超大陣生蒜頭味

隻雪凍左o既戰鬥碗係幾得
但 哈爾濱本身真係好好飲喎
清清o地唔覺唔覺就飲左兩三碗

而人多又果然好辦事
叫[食送]都可以唔駛就住就住
墨魚咀、南乳香酥骨、鬼馬油炸鬼等等
想食O既都食左;

不過星期五晚7點鐘就已經叫呢樣無呢樣
係有點離奇的

aiya 緣份呢樣野講到爛晒都要講架喇(!)
個果蓉鳳片o的牛油果
最終竟然o係碟nachos度遇上囉

但我始終都係想試下牛油果同茄子炒埋一碟係咩味。

巧合

尋晚可能因為去飲食得太多油膩野
好想訓醒之後有碗粥食

今朝(err 係晏晝先o岩)起身竟然發現飯枱就放左兩/paang1/粥o係度
(仲要係超經典o個種飯壺!)
超感動的說!

雖然已經無以前咁愛艇仔粥
但o個份巧合已經搭夠

不過樓下大排檔o的炒米粉真係越黎越難食喎
咪再買啦媽咪!

P.S.
另外我發現我已經變左心啦
竟然愛上左一路都唔接受o既皮蛋瘦肉粥

Boring but not bored

出席左個準時八點開席九點九散場十點返到屋企o既滿月酒
見到張貼左o係大門口上菜枱列晒菜式之餘仲寫埋每席$2888(!)o既菜單
叫左兩聲食完西蘭花XX片之後就頹晒無再叫過連杯都唔拎起o既「飲杯!」
o趙左好多舊唔係花枝又唔係帶子但又同西蘭花炒埋一碟o既XX片
食左條明明蒸得唔夠熟仲有o的黐肉但啖啖都係鞋o既魚
梗左舊以為係花膠其實就唔入味又腥腥o地o既魚鰾
放棄左一碗唔記得係幸福定快樂總之就咸到震o既炒飯
飲左碗全晚算係good o既一道菜紅豆沙

菜式悶
親戚悶
連電視都咁悶
但其實我又唔覺得好悶
呢種感覺
好似N年前阿羅小姐話《慾望號街車》係悶但又好好睇一樣咁吊詭
(hoho 又扮野!)

頂住頂住

哎呀明明一坐低o個時係想食豉汁白鱔
但點解最終會叫左咸魚肉片o架?!
(註：張相係搭枱o個位叫o既鳳爪滑雞)
又唔記得左o係街食到o既
通常都係梅香rather than馬友
(hoho 扮晒野其實咪又係早兩日聽o的同事講完先識分)
下次都係要問清楚(定諗清楚呢其實?!)先好落單

而對於一個通常晚餐都唔食米飯o既人o黎講
十點幾先食一煲飯絕對係無用腦諗野
Quote 返套戲o個句：
〝I was just stupid〞

P.S. 搭枱o個位對住個廟街阿姐講〝唔該一枝Budweiser〞
係另一件stupid事!

P.P.S. o個度興野食上齊枱就找數
但搭枱o個位竟然臨走o個時又叫埋單
我真係想同佢埋單 *_*

喂你都唔好將米線當係公仔麵喎

〝昌隆雲貴風味酸辣米線〞(Shum Shui Po)

沙爹牛肉(!)
雪菜肉絲(!!)
司華力腸(!!!)

喂
唔好以為將個menu放o係個茶餐廳常用o既阿華田餐牌座度
就可以加埋o的茶餐碗麵必食o既配料落去o羅

仲有呀
唔駛寫明話o的司華力腸每碗米線只可以配一條喎
邊個會咁bad taste一路食住碗有芽菜同腐皮o既米線一路咬腸仔先(嘔!)
司華力腸
我唔係唔鍾意你
但你都係返番去7-11 o的燒賣身邊啦


唉 好在佢都有o的正常o的o既配料
就食個勁清淡o既腐皮+竹笙

一上枱發現韮菜同酸菜唔見人
頂 得一大堆芽菜
食魚蛋粉呀家陣?

米線口感okay
而個湯係幾有肉味
但較為油膩
似出前一丁豬骨湯麵個湯底咁油

腐皮就以一團腐皮卷o既姿態(!)浮面
唔似得譚仔o個邊咁撩開左先淥;
係先入為主o者
食落都係滑o既

竹笙無乜好講
係衰格在跟足隔離鋪
呢款料要收多一蚊

我初頭係俾門口阿鄭嘉穎同個老細影o個張相吸引左入去
但走o個時先發現其實仲有張係佘詩曼 & 楊怡 o既
Oh, "Yummy Yummy"?
陰me陰me! (爛!)

P.S. 點解唔見阿Ter-Ry o既?
P.P.S. 呢碗野其實味道係okay o架，但只不過唔係我想要o既野o羅。

車仔麵你咪扮米線啦

繼續搞爛ryhme!

凍檸茶無冰
湯底有味精

魚腐扁tet tet
好似一塊石

粒丸林滋滋
似食糯米糍?!

其實坐低先發覺
[食送]o既選擇太似車仔麵喇 (芝士腸!)
只怪睇得太遲;
o的阿姐又會俾無"聲"壓力拎住本簿企o係隔離催人落單
頂 天秤座o既係猶豫不決O的o架啦
唯一比較可取o既
係o的米線尚算彈牙o羅

返工返左12個鐘仲要食埋碗咁o既o野
!
唔夠訓真係好容易做錯事!

YouYou跌watt

撇除碗湯o既不幸事件
今次o的野食似乎稍為退左步喎

雞絲粉皮
爽得離奇!
炸蠔無醬點
食到咀扁扁 (唔搞爛gag搞爛rhyme!)

係因為上次上完2-day workshop太過crave for some dining out?
定抑或係今次o的送叫錯左?
Anyway 呢度都係o係TST gathering地點o既頭幾位o黎o既;

o拿o拿o拿你裝修同形式似和民好喇
千祈咪步佢後塵呀

不常見的腸粉餡料

兩樣unfamiliar o既腸粉餡料
燒鴨豬潤雙拼
承惠$16

叫之前其實係有預左呢兩樣料唔太夾
都係衰貪心想試晒呢兩種料
結果咪就係豬潤o的味太搶
而燒鴨份量相對地少
要自行將o的料分番開佢先食到兩種味o羅

客觀o的講返條腸粉本身啦
塊腸粉皮係幾薄幾滑o既
而o的豉油係「少甜」(我就唔太習慣)
o的豬潤又幾爽咁啦


反而個魚片粥有o的驚喜喎
一o的都唔腥
o的粥又煲得夠棉
(最怕o的稀溜溜但又煲到o的米開晒花o既「粥水」)
但若果我無食錯的話 係有幾大陣胡椒粉o既辣味
好在有o的芫莤搶返味加返分

---------------------------------------------
有機會都仲會去試下其他unfamiliar o既腸粉餡料